Maxaa La Gudboon Raila Odinga Ka Dib Natiijadii Doorashada?
Guddoomiyaha guddiga doorashada ee Kenya ayaa ku dhawaaqay in William Ruto uu ku guuleystay doorashada madaxweynaha, haddaba maxaa la gudboon isbaheysiga uu hoggaamiyo Raila Odinga.
Raila Odinga ilaa iyo
hadda kama uusan hadlin natiijada doorashada. Laakiinse Martha Karua oo ah ku
xigeenka isbaheysiga uu hoggaamiyo Raila Odinga ayaa barteeda Twitter-ka soo
dhigtay qoraal ay ku sheegeyso, 'Arrinta ma dhammaan ilaa iyo ka dhammaato'
Ma hubno waxa ay ugala
jeeddo qoraalkan balse dad badan waxay u arkaan in isbaheysiga Azimio ee uu
hoggaamiyo Raila Odinga ay ugu dambeyn Isniinta maxkamad geyn doonaan dacwad ka
dhan ah natiijada ay ku dhawaaqeen guddiga doorashada.
Sida uu dhigayo sharciga
Kenya, musharraxa madaxweyne ee doodda ka qabo doorashada waa in muddo toddobo
maalmood gudahooda uu dacwad ugu gudbiyaa maxkamadda.
Buuq iyo jahwareer ayaa
maanta harreeyay xarunta Bomas ee looga dhawaaqay In Ruto uu ku guuleysatay
doorashada madaxtinimada ee Kenya.
Waxay u muuqatay in uu
buuqa ka dhashay markii qof taageersanaa Raila Odinga uu isku dayay in uu hor
istaago in uu hadlo guddoomiyaha guddiga doorashada Wafula Chebukati.
Waxaana xaaladda
dejiyay sarkaal ka tirsan booliska Kenya. Guddiga doorashada iyo xuduudaha ee
Kenya, ayaa laba garab u kala qeybsamay, xilli la sugayey in lagu dhawaaqo
natiijada kama danbeysta ah ee doorashadii guud ee ka dhacday dalkaas.
Kala qeybsanaanta
guddiga doorashada ayaa waxay sare u sii qaaday walaacii ay qabeen shacabka
Kenyanka.
Wakiilka madaxa
doorashada ee Raila Odinga Saitabao Kanchory ayaa sheegay in kooxdiisu aysan
awoodin inay hubsadaan qaar ka mid ah natiijada, sidaas darteedna aysan
oggolana doonin in musharaxooda madaxweynenimo uu yimaado xarunta looga
dhawaaqayay natiijada.
Waxay sheegeen inay
jireen wax isdaba marin dhanka codadka ah. Raila Odinga wuxuu sanadkii 2017
maxkamadda geeyay natiijada doorashada, maxkamadda ayaa markii dambe waxbo kama
jiraan ka dhigtay natiijada iyadoo doorashada dib looogu celiyay inkasta uusan
doorashadaas ku guuleysan.
Wixii intaa ka
dambeeyay wuxuu saaxib la noqday Madaxweyne Uhuru Kenyatta, Tallaabada uu
madaxweyne Kenyatta ku taageeray Mr Odinga doorashadan ayaa loo arkayay isku
day uu ku doonayo in uu ka tego raad si uu mideeyo laba qoys oo si wada jir ah
ula dagaalamay gumeystihii Ingiriiska - kuwaas is khilaafay 1966.
Ruto iyo Uhuru waxay
sanadkii 2013-kii sameysteen isbaheysi ay kaga hortagayeen dacwadihii loo
gudbiyay maxkamadda dambiyada caalamiga ah ee ICC kadib rabshadihii doorashada
ee dhimashada horseeday ee ka dhacay Kenya sanadkii 2007-dii.
Guusha Ruto
Guddoomiyaha guddiga
doorashada ayaa sheegay in Ruto uu helay 50.49% codadkii la dhiibtay halka
Raila uu helay boqolkiiba 48.8.
Madaxwaynaha la doortay
ee dalka Kenya William Ruto oo khudbad jeediyay ayaa u mahadceliyay guddiga
doorashada howsha culus ee ay qabteen.
Waxaa uu sidoo kale u
mahadceliyay shacabka Kenyanka ee doortay. "Waa maqribno cajiib ah waxaa
ay awood oo dhan u sugnaatay dadka Kenya," ayuu khudbadiisa ku yiri.
"Waxaan u
mahadcelinayaa allihii na soo gaadhsiiyay goobta aan maanta joogno.
BBC