Madaxweynaha Rwanda Paul Kagame ayaa booqday gobolka Cabo Delgado ee waqooyiga Mozambique si uu u xaqiijiyo muhiimadda iskaashiga labada dal.

Kagame wuxuu la kulmay Madaxweyne Nyusi wuxuuna xaqiijiyay in colaadda waqooyi-bari Mozambique ee ka dhanka ah kooxaha jihaadka ee hubaysan, ay calaamad u tahay guulaha qaar ka mid ah ciidamada Mozambique iyo Rwanda, ay ku talo jiraan "marxaladan xoojinta ah”

"Ma arko wax dhibaato ah oo aan laga gudbi karin halkan; ha ahaato la dagaallanka kooxaha nabad-diidka ah, la dagaallanka argagaxisada, iyo la tacaalida arrimaha horumarineed ee loo baahanyahay. Ma arko dhibaato aan laga gudbi karin,” ayuu yiri Kagame.

Rwanda waxay ahayd dalkii ugu horreeyay ee Afrikaan ah oo ciidamo u soo dira gobolka, kun askari iyo saraakiil boolis ah ayay dirtay bishii Luulyo, si ay u caawiyaan ciidanka Mozambique ee waqooyi-bari ee dalka mozambique oo wajahaya weerarada sii kordhaya ee kooxaha hubeysan tan iyo sanadkii 2017-kii.

Waddamada kale ee gobolka ayaa iyaguna ku dayday, oo ay ku jirto Koonfur Afrika, oo u dirtay 1,500 oo askari.

Militariga Rwanda ayaa horraantii bishii Ogosto sheegay in ciidamadooda iyo kuwa Mozambique ay dib ula wareegeen Mocímboa da Praia, oo ah magaalo deked muhiim u ah kooxaha Islaamiyiinta ee waqooyiga Mozambique.

Mocímboa da Praia oo ku taal gobolka Cabo Delgado ayaa ahayd goobtii ugu dambaysay ee fallaagadu lahayd oo hoy u ahayd mid ka mid ah gaaska Afrika ugu weyn.

Dagaalamayaasha ayaan weli ka hadlin laakiin warkan ayaa loo arkaa faa’ido weyn oo Mozambique u soo hoyatay marka la eego dagaalka ay kula jirto fallaagada waqooyiga

Rwanda ayaa bishii hore 1,000 askari u dirtay Mozambique si ay ula dagaallamaan xagjiriinta, kuwaas oo bilaabay kacdoon sannadkii 2017-kii.

In ka badan 3,000 oo qof ayaa la dilay halka 820,000 ay barakaceen intii uu socday iskahorimaadku.

Ciidamada qalabka sida ee Mozambique oo la daalaa dhacaya sidii ay gacanta ugu soo dhigi lahaayeen gobolka ayaa ka caga jiidayay inay raadsadaan kaalmo milatari oo shisheeye laakiin hadda waxay kaalmo ka heleen deriskooda.

Urur-goboleedka Koonfur Afrika, SADC, wuxuu dirayaa boqollaal ciidan ah, halka gumeystihii hore ee Portugal uu isna dagaalka qayb ka yahay oo askar keenayo.