Halkee Ayey Ciyaarta Kubada-Cagtu Ka Soo Bilaabantay.....Yaase Hindisay?!!
Osman Abdillahi Sool.
Dadka Taariikhda Baadhaa badankoodu Waxay isku raacsan
yihiin in ciyaarta K/Cagta ee dunida laga ciyaaro uu bilaabay boqor u
dhashay dalka Shiinaha oo la odhan jiray Haung-Ti, isaga oo u sameeyay
sharciyo kooban oo la xidhiidhayey habsami u socodsiinta Ciyaarta.
Qiyaastiina waxaa la sheegaa inay ka soo wareegtay afar kun iyo dhowr
iyo labaatan sano markii uu Ciyaartaasi alifay. Waxaa jira dad qaba in
ciyaarta Kubadda Cagtu ay ka soo bilaabatay jasiiradaha Badda Koonfureed
ee (South Sea Islands).Taariikh yahanada badankood gaar ahaan kuwa
baadha taariikhaha duugoobay iyo waxyaabaha ka hadhay ee loo yaqaano
"Archeologists" waxay sheegeen in Afrikada Tropical-ka lagu ciyaari
jiray ciyaar u eg Kubadda Cagta.
Waxaa jira taariikh yahano kale oo iyaguna tilmaamaya in
K/Cagta ciyaarteedu ay bilaabeen Masaaridii hore, Giriigii iyo
Roomaaniyiintii intuba.
Hase yeeshee taariikh yahanada Ingiriiska ka soo jeeda waxay
ku adkaysteen in ciyaartii ugu horaysay ee Kubad cagta ee tartan ahaan
loo qabto ay ka dhacday magaa-lada "Derby" ee dalka Ingiriiska sanadku
markuu ahaa 250 AD.
Magaaladaasi ciyaartaasi ayey can ku noqotay, waayo waxay
ciyaartaas kaga adkaadeen Roomaaniyiinta oo markaas Ingiriiska haystay.
Sida hadaba muuqata way adagtahay sida loo kala saarayo
halka ay run ahaantii K/Cagtu ka soo bilaabatay iyo ka been sheegidda
taariikhda Asliga ah.
Waxaase xusid mudan runna ah oo la hubaa in sharciyada
K/Cagta ay isbedelayeen, maalinba maalinta ka danbeysana wax lagu
kordhinaayay waxna laga dhimaayay, waxaa jirta waayadii hore in cid
kasta oo K/Cagta aliftayba aanay iyagu samaynin sharciyada hadda lagu
dhaqmo.
Waagii hore K/Cagta waxaa loo ciyaari jiray hab aan si
taxadar leh oo kontrol leh ku dhisnayn, dadka Ciyaarayana si daran ayey
isu dili-jireen inta ciyaarta ay ku guda jiraan. Dadka qaarkii waxa ay
sheegaan in K/Cagta waayihii ugu horeeyey marka la ciyaarayo Kubad ahaan
loo isticmaali jiray dadka dagaalada ku dhinta madaxyadooda iyo
waxyaabo la mid ah, arrintuse si kastaba ha ahaatee waxaa manta aanu
shaki ku jirin in Qarnigii 11aad K/Cagta si aan tuhun ku jirin looga
ciyaarayey qaaradda Yurub.
Osman Abdillahi Sool.... Freelance [email protected]. Copenhagen.
AFEEF:
Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!
Loading...
Loading...