Faallo:- Sooyaalkii Kulmiye Iyo Qaab Dhaqmeed-kiisa Taariikheed ( Abdi-Shotaly).

Visits: 1578
(Rating 0.0/5 Stars) Total Votes: 0
0 0
Share via Social Media

Faallo:- Sooyaalkii Kulmiye Iyo Qaab Dhaqmeed-kiisa Taariikheed ( Abdi-Shotaly).

Qore:- Abdi-Shotaly.

Share

Qore:- Abdi-Shotaly.

Dadka malaha qaar baa ka yaaban arimaha ka dhex socdda Xusbiga kor ku xusan, laakiin-se waa dhaqan u caadi ah oo kun jeer uu hore ugu soo talaab-saday, Waxa la yidhi " Waxaad ceebta u taqaan, rag bay camal-koodda tahay" In la isu muquuniyo, oo kolba ka kursiga ku fadhiyaa uu sidda uu doono ka yeello, waa wax soo jireen u ah ee si kale-ba wax uma kala cunaan. Haddii sooyaalka taariikheed aad dib u raacdo, ee uu jilibka ku soo dhuftay intuu jirey-ba, waxa aad si cad u ogaanaysaa waxa uu yahay iyo qaabka uu u dhaqmaa ama u shaqeeyo, in ay yihiin wax ka fog caqliga saliimka ah, kaas oo ah keligii talisnimo uu ku talax tegay, isaga oo ay hal hays u noqotay " Hebel loo joojin maayo iyo aniga baa mididda daab-keedda haya" Taas oo uu micna-heedu yahay, wax aan xeerinayo iyo qaanuun aan tix gelinayaa mid-na ma jiro, ee aniga uun ha la ii daba fadhiisto, kii diidaana wuu iska tegayaa. Dadka khalad-kayga sheega-na waan eryayaa, midkii aan ku shaqaysan karo-na waan keenayaa, waa shuqulka uu ku caan baxay " Qudhmiye" ee yaan loo daymo la'aan.

Akhristaw, waxan halkan hoose ku soo tixi doonaa, aniga oo soo koobi doona, inta jeer ee uu is muquuniyey iyo kuwii la muquuniyey ciddii ay haayeen, inta ka biyo diiday qaabkan, toosna uga dhaqaaqay, ee yidhi wixii aan Af-weyne ka diidnay, cidi kale ka yeeli mayno, halkan hoos ka akhri:-

(1) Shirkii Golaha dhexe ee lagu qabtay Burco, waxa madax-weyne ku xigeen ahaa Mudane/Mujaahdi Cabdiraxmaan Aw cali markii Burco la isla tegay, ha-yeeshee inta loo qayilay, baa la waydeeriyey karkaarka, waxan dhabarka uu taabtay Siilaanyo Mudane Cabdiraxmaan Saylici, halkaasna waxa ka dareeray, rag badan oo uu ka mid ahaa Mujaahid Dhego-weyne iyo qaar kaloo aad u qaali ahaa.

(2) Shirkii kaa ka dambeeyey ee uu yeesho kulmiye, isna waxa ka dhacay ceebtii ugu xumayd ee ina soo marta, oo ay dheer tahay weliba gacan ka hadal loo geestay Mudane Cabdiraxmaan Cabdilqaadir, oo loo dal-baday booliis, inta la isugu tegay dhabarka lagaga jebiyey, oo tu Alle uun ku badbaaday, halkii-siina lagu bedelay "Geenyo Shaaximan".

(3) Madax-weyne Siilaanyo, baa ku soo baxay doorshaddii, laakiin-se ka dib markuu ka fadhiyi waayey labadan askari iyo xanuun uu ka shaqayn kari waayey awgeed, buu ka tanaasulay in uu mar dambe isu soo taago musharaxnimo. Halkaa markii ay maraysay, waxa loolan xoogan oo rebshedo ku dheehan yihiin iyo shaani qarxin, mudaaharaado ay dad ku naf waayeen, kala dhex kacay kuwa maanta hor boodaaya "Qudhmiye" ( Waa labadda askariye). Waxa hirdan adag kursiga musharaxa gudoomiyaha u soo tafa-xaytay:-

(4) Jano-ka-bood ( Waa Samaale'e), oo ahaan jirey Gudoomiye ku xigeenkii Golaha Wakiiladda, ka bacdina noqday " Wasiirkii Maaliyadda" Maxamed Biixi Yoonis iyo Askarigan laf-tiisa meesha baf-baf leh. Hadaba Madax-weyne Axmed Siilaanyo, Markii uu is ogaaday in aanu sii wadi karin hawshan, wuxu ka xayuubiyey wasiir-nimaddii "Janao-ka-bood" Isaga oo sameeyey khaladkii abid ugu weynaa, isna waa ka dhacay foodkii, sidda uu cadeeyey " Maxamuud Xaashi" inta uu si xun ugu takri falay awoodii dawladnimo.Taas oo noqotay " Caado la gooyaa cadho Allay leedahay".

(5) Hakaas waxa kaga dareeray, dhamaan mudantii qor-weynta ahayd ee hogaanka " Kulmiye" kolkii uu isu bedelay " Qudhmiye" Markii uu u gacan galay " Raggii ma adigaa ka hadhay" Waxa Saluug weyn ka muujiyey oo si cad uga badheedhay ku sii jiritaan-kiisa Mudantii Xusbiga, oo kala ahaa, Xirsi Xaaji Cali, Abiib Tima-cad. Maxamed Biixi Yoonis, Cali Cawaale, Jano-ka bood ( Waa Samaale'e), Wasiirki beeraha ee Geedoole, Xil. Waabeeyo, Xil. Kijandhe, Ismaaciil Yare, Xuseen Caydiid, Xil.dhibaan NacNac iyo qaar kaloo badan. intaas oo dhami waxay isku shubeen Waddani ( marka laga reebo Jano-ka-bood iyo Kijandhe) oo dib ugu noqday askariga iyo Qudhmiye. Intaa kale ka dib markay arkeen in kii yaqaaneen, ee anshax xumi mooyaane aan faa'iido lahayni in uu shooladda u galay " Xaafad-Tooyadda" Maxamuud Xaashi Beenaale-na" uu gundhadda u sii fadhiistay. Meeshii ay noqotay in awoodda qaranka la isu adeeg-sado.

Intaas dhacdaye hadaba maxaa ka dambeeyey? Shirkii Boorame oo Jaamac Shabeel iyo rag kale iyana debedda loo qubay, soo dhaafoo hadda Maxaa ka taagan maamulka askarta? Akhrisataw, Horaa loo yidhi " Bahal caydhin ma daayo, nina caadi ma baajo " Wuxu ku dambeeyey " Kud ka guur oo qanjo u guur Iyo Xasan Jigin Bikh" Waxa durbaba bilaabmay, dhabar is taabasho, is haraati, feedh la isu duubtay, oo ku salaysan kaalay wax iga qaad iyo waa inoo tahay, ha-yeeshee la is muquuni sidda ka muuqata, meel baa la is mariyey. Mana jirto waan-waani ee waa lagu kala xoog weynaaday, Sidda ay sheegeen kuwa u adeega askarigu. Si kaste-ba ha ahaatee, shirkan la filaayo in uu dhaco 04/10/2020, Waxa buugga tartanka laga sii saaray Maxamuud Xaashi ( Beenaale), Qabyo-Tire, Ahmed Muumin Seed, Cabdiraxmaan Saylici iyo rag kale oo loolanka ka qayb geli lahaa, loogu jiro tartanka gudoomiya-yaasha " Qudhmiye" Xaalku wuxu marayaa hadeer " Allaw ray iyo Allaw ronaa cid u hadha-ba. Halkaas oo uu ka bilaabmay mid-la-mid ah burburkii iyo Kala yaaci ku dhacay " Xusbiggii Udub" Mar haddii uu yahay xaalku kaalay wax iga qaad iyo ma adaa ku dhici kara in aad ka baxdo heshiikii Burco iyo isku cariigsi ku dhisan baadh canaad, la isku seegan yahay wixii la kala saxeexday, oo ahaa in Gudoomiya-nimadda lagu wareejiyo Beesha Burco Bari. Ugu dambayn waxan ku soo xidhay faaladan, Waa loo fadhiyaa halka ay ka caga taagato, in kaste oo 80% ay ku kala baxeen taageera-yaashii gaashaan buurta ku ahaa Kulmiye, wakhtiggii uu gacanta ku hayey Madax-weyne Siilaanyo, balse aan eegno Uuraysa-taye waxay umuli doonto.

* N.B Bahal Caydhin Ma Daayo, Nina Caadi Ma Baajo!

Qore:- Abdi-Shotaly.

AFEEF:

Hadhwanaagnews marnaba masuul kama aha Aragtida dadka kale. Qoraaga ayaa xumaanteeda, xushmadeeda iyo xilkeeda sida. waxa kaliya oo Hadhwanaagmedia dhiirigalinaysaa, isdhaafsiga aragtida, canaanta gacaliyo talo wadaagga!