Maansadan waa mid kamid maansooyinka waanooyinka wax ku oolka ah ku jalbeebiya umada soomaliyeed.

Waxay umada si guud u siinaysaa dardaaran hor-leh kaas oo dhinacyo kala gedisan taabanaya aduun iyo aakhiraba, horumarka dunida aan guudkeeda saaranahay iyo sidii aan wax uga qabsan lahayn, iyo sidoo kale u tabaabushaysiga geediga hayaanka ah ee aakhiro ee lama huraanka ah.

Maansadan waxa curiyey cabdirisaaq axmed cigaal(darwiish) waxaanu yidhi isagoo arimahaa si dareen taabad leh usoo banbixinaaya:

    Ha u diririn duunyada

    Ha ku daalin daaraha

    Ha u dansheegan waayaha

    Hana dayicin diintiyo

    Dacwadii rasuulkiyo

    Daakiraada subixiyo

    Eebihii kuu duurbiday

    Cibaadadiisa doorka ah

    Dunidiisa yaabka leh

    Ha ku doodin cuudkiyo

    Cilmi iyo daraasado

    Ama dabaqyo dhaadheer

    Ha u dudin weligaa

    Damanaha hurdaayee

    Daad-xoortu qaadee

    Aan dedaalin abidkii

    Wehel u tahay duunyadu

    Darsi weeye noloshuye

    Dantaada ka ogow

    Caafimaadku waa dahab

    Dadka daaim saaroo

    Waxa garan mid dilan

    Iyo kii sariir dulyaalee

    Ishu daawanaysee

    Dibindaabyo ugu jira

    Dumarkeena qaaliga ah

    Dunjigooda wanaagsan

    Xilaheena deeqda leh

    Yaan wax daw-dhaafiyo

    Deelqaaf la odhanin

    Kii dulaystayoow maqal

    Dambi kamaad yaabine

    Dameerkuba ma yeeleen

    Halkaad talo u doorbiday

    Duunyadaada gaarka ah

    Deyr adag ku xidho

    Yaanay kaa didine

    Xoolaha dadweynaha

    Daankaaga yey gelin

    Uurkaaga ha daajin

    Dabaqyada cadaabaha

    Dirirteeda ka fogow

    Duulaanka sokeeyaha

    Daandaansi ka dhowrso

    Qaarbaa loogu dawgalee

    Dulqaadkana ha saydhin

    Iyo daacadnimada caynkeed

    Jaarka deriskaagana

    Xaq dhowr ugu dedaal

    Digtoonaada weligiin

    U dedaala aakhiro

    Duni joogi maynee

    Duunyada xageedana

    Danihiina ka adkaada

    Hore u kaca doona

    Saboolnimada diida

    Risiqiina u doonta

    Degalkiina hodanka ah

    Soo saara dalagiyo

    Dahabkiyo naxaastiyo

    Diisalkiyo batroolkiyo

    Ama deemantiyo luulkiyo

    Diisha faqriga tuura

    Qaadkaad daainteen

    Degelkiinii ba’shee

    Daciifnimo idiin saaray

    Duunyadiinii lunshee

    Eyro iyo geelba loo duubay

    Aakhiradiinii ku duulay

    Digtooni u lahaada

    Dubaaqiina ka saara

    Daryeel idiin mahayee

    Qabyaaladan dulaysan

    Ku kala durkay xigaalkii

    Xididna aan loo doorbidin

    Inta aabo loo duugay

    Inta loo gawracay wiil darban

    Inta dumar asay qaaday

    Inta hooyo goblan daaray

    Inta loo kala dhacay duunyo

    Inta soomaali isu diiday