Qoraa Maxamed Baashe Xaaji Xasan Oo Soo Bandhigay Falalka Musuq Maasuq Ee Madaxweyne Muuse Biixi Iyo Xukuumadiisu Iyo Xadiga Lacag La Leexsaday


(Hadhwanaagnews) Monday, February 11, 2019 19:05:42
Qoraa Maxamed Baashe Xaaji Xasan Oo Soo Bandhigay Falalka Musuq Maasuq Ee Madaxweyne Muuse Biixi Iyo Xukuumadiisu Iyo Xadiga Lacag La Leexsaday

Hargeysa(HWN):-Qoraa Maxamed Baashe Xaaji Xasan oo ka mid ah aqoonyahanka somaliland ayaa soo bandhigay  falal musuq maasuq oo uu sheegay in lagu kacay.

Qoraa Maxamed Baashe Xaaji Xasan oo soo bandhigay qoraal uu kaga hadlayo lacago uu sheegay in la leexsaday oo qaranku lahaa ayaa  iftiimiyey halka ay lacagahaasi ka yimaadeen iyo cida ay gacanta u galeen.

Qoraa Maxamed Baashe Xaaji Xasan ayaa si gaar ah farta ugu fiiqay lacago gacanta laga galiyey madaxweyne Muuse Biixi, waxaanu qoraalkiisa ku yidhi:-

$93 milyan ayuu Muuse ka qaatay oo qaddimaad ah saldhigga Berbera oo gacantiisa qofnimo ku dhacday. Waa war sugan oo ilo xogagaal




ahi bixiyeen.

$5 milyan ayay UAE bil kasta muddo sannad ah ku kabaysaa, laga bilaabo safarkii madaxweynuhu ku tegey UAE sannadkii hore bilowgiisii, kor u soo qaadidda qiimaha shilinka Somaliland, bishii u horreysey oo qudha ayay lacagtaasi ku dhacday bangiga dhexe, wixii ka dambeeyey lacagtaasi waa la leexsadaa oo bangiga ma gasho. Isna waa war kale oo sugan oo ilahaas xogagaalka ahi bixiyeen.

Saamigii Somaliland ee DP World ee dekedda oo ahaa 30% kuma dhaco khasnadda dawladda, laguma daro miisaaniyadda ee waxa ay ku dhacdaa xisaabaadka Dubai Somaliland Investment Company oo shakhsiyaad ku qoran. Iyana waa xog kale oo sugan.

Lacagta ka soo baxda Haamaha Shiidaalka iyo meelihii kale gacanta xukuumadda lagu soo celiyey Aug 2018 sida adeegyadii madaarka iyo arrimaha amnigiisu lama yaqaan illaa hadda meel ka baxdo oo ma gasho qasanadda xukuumadda!

Waxa jira heshiisyo qandaraas oo malaayiin Dollar ku kacaya oo si aan sharciga waafaqsanayn loo siiyey shakhsiyaad lagu naasnuujinayo, sida kuwo la siiyay Ganacsato iyo qaar kale intaas ka sii miisaan yar oo la siiyey xubno kale oo ay qaar ka mid yihiin qoyska madaxweynaha. Waa xog soo baxday oo caddaynteeda warbaahintu faafisay.

Guriyaha la binaynayo ama kuwa iyaga oo dhisan la maydhaamayaa iyo dhil beereedka lagu durkayaa waa ay soo kordhayaan oo sidii aynu qormo hore wax kaga iftiiminnay.

Xaafadaha Hargeysa qaar waxa uu madaxweynuhu noqday cashuur-bixiyaha ugu weyn!

Sannad iyo laba bilood ayaa u buuxsamey xukuumadda Muuse Biixi oo ay dul hoganayaan daruuro madmadow oo musuq, boob, eex iyo qaraabokiil ah.

Maamul xumaantii maamullada ayaa Hargeysa ka soo ifbaxday!

Halka lagu degdegayaa, ma xeedhada salkeeda?!

Wixii hore bikh iyo in qarso saw ma noqonayaan?! Akhas!

"Nin agoon ku xaday qalin
Gooray ku qaraxdaba
Qaaxo kama fogaato!"

"Cuqubada halkii lagu galay caw ku huruddaaye
Carruurtay ka laysaa ninkii caano baas dhama!"

"In kastoo Watiiniyo Wallayn iyo Wayllun lagu meersho
Weligeedba xaaraantu way waras garowdaa!"

Miyay gacmo aan daahir ahayni nijaas kaa daahirin karaan?!

"Taaj madaxa awr loo geshaa waa tusmo habow!"

 




©2014 Hadhanaagnews Media Network All Rights Reserved.